اليوم : الخميس 26-07-2012 .
الوجهة : مصر القديمة , قرية الفخار , درب 17 18 .
الذهاب : مواصلات وهنا الأحداث كلها بقى . xD
العودة : بالسيارة مع صديق.
الحدث : حفلة فريق مسار إجبارى .
الشخصيات :-
انا : ساديككم اللى مصدعكوا فى المدونة دى .
هشام : ساديكى اللى مجاش الحفلة علشان احنا طالعين مواصلات ,
علاء : ساديكى اللى طلع معايا واتمرمطنا سوا ,
د/علاء : ساديكى اللى كان فى القاهرة وحضرنا الحفلة ورجعنا سوا بالعربية .
د/احمد: ساديكى اللى عربيته عملت حادثة قبلها بيوم ~_~
تبدأ الأحداث بحالة من النسيان . كان من المفترض ان اكون فى القاهرة وانا وهشام يوم الخميس الصبح لاننا كنا هنتحرك مع د/علاء فى العربية وكل واحد يشوف طريقه وبعدين نتقابل بعد الفطار وقت الحفلة الا ان ده محصلش و د/علاء نسى يكلمنا , وهوب قام مكلمنى على الساعة 4 بعد العصر كده !! طلعت فى دماغى بقى اروح الحفلة ، كلمت هشام لاقيته نايم ومأنتخ (مهو لسة مركب تكييف ) وقال فكك مش لازم وكام عزر كده مفهمتهمش !!وبعد كا ساعة كده قالى لو طالعين بعربية كلمنى . فا كلمت الشخصية التانية "علاء" واشطة وهنخرج بقى . فا قال علاء يشوف د/احمد يمكن يحب يطلع والمؤكد انه مش هيقدر يطلع بالعربية لأن السواق عمل بيها حادثه اليوم اللى قبل الحفلة وكسر الزجاج وكابوت العربية (المهم احمد كان بيصلح العربية فى طنطا وبعدين راح المحلة وبعدها جالنا القاهرة بس ملحقش الحفلة )
تبدأ بقى الرحلة اتجاه القاهره وقبل وقت الفطار بساعة ونص ومفيش ولا عربية فى الموقف بتحمل القاهرة ..!
طيب نركب طنطا ومن طنطا للقاهرة وركبنا طنطا الحمد لله فى اوتوبيس ابن تيت مرمطنا على ما طلع ومرمطنا على ما وصل .
قبل الفطار ب 10 دقايق كنا فى المعرض ! طيب نروح نفطر فى مطعم زى ما علاء كان عايز ولا نعمل إيه !؟ بحسبة بسيطة كده لقيت اننا لو متحركناش دلوقت فى عربية مش هنلحق اى حاجه ونلف نرجع تانى احسن ، فى الوقت ده كان فيه عربيتين بتحمل والاتنين فاضيين ومفيهمش حد ! وهوب لعب القدر لعبته ولقينا حد طالع القاهره وركبنا معاه وكان هيحصل مشاكل مع العربيتين اللى كانوا واقفين علشان احنا ركبنا معاه بس عدت الحمدلله .
تمشى العربية ونفطر فى الطريق عصائر وماء بس (مش عارف ماء بالعاميه المفروض اكتبها ميه ولا ايه ؟ :D ) , وتحصل مشكلة ، السواق معدى على منطقة مش فاكر اسمها ايه المهم انه يعتبر موقف ، وفيه عربية بتحمل القاهرة فـ لقينا وسواق شاوله وقاله القاهرة واحد بس فا ركنله . هوب الناس كلها جات ركبت وهوب الكلام معجبش السواقين اللى بتحمل وجات تعمل مشكلة مع السواق وعايزينه ياخدهم ويجيب اجرتهم يا اما ينزلهم ! ويفتح الواد مطوة فى ايده علشان يخوف السواق ويحطها فى جيبه تانى وجو من البلطجة الكلامية وانا طبعا مش عايز اتأخر فا حاولت اتدخل فى الحوار واكلمه . يا اسطى وهو ولا معبر ، يا ريس انا بكلمك وهو ولا فى الدماغ وشايط فى السواق اللى جنبى اللى هو اصلا بيقوله هنزلك الركاب ، طب يا سيدى احترمنى انا بكلمك فا رد المره دى بحاجه غريبه مفهمتهاش وكأنه بيقولى انت على عينى وراسى وبعدها دخل شمال وقال انت ملكش فيه ده كلام سواقين ملكش انت دخل بيه !؟ فا انا فعلا مليش دخل بيه بس انا عايز انجز المهم بكلمه واقوله هو هينزلك الركاب وتبقى اتجوزت ومفيش حاجه حصلت مشى وبتاع وجه واحد بيعرف يتفاهم ونزل السواق قال للناس تنزل واتفضت الليله وضاع بتاع ربع ساعة فى الحوار ده ^_^
تعدى الدقايق والكيلوهات والأميال والسواق دايس على 120 والحياة فل ونلاقى حالتين قمة فى العته فى السواقة !! الأولى عربية 128 ماشية على التانى تقريبا وواخده شمال مش حتى سايبه اليمين فاضى ده واخده نص الشمال ونص اليمين وتقلبله نور مفيش فايده !!
ونفكنا من دى وندخل فى التانية ميكروباص لا واخد يمين ولا واخد شمال بس رامى ع اليمين وفهمنا بعد كده انه كان بيركن عشان ينزل ركاب ( بيركن من غير إشارة ) واحنا معديين من يمينه وهو زى اللطخ لا نور نافع معاه ولا كلاكسات وبردو واخد يمينه لحد ما نزلنا فى التراب وعدت على خير الحمدلله والغريب ان معجبهوش الكلام وركن قدامنا ونزل قاله كلمتين !!
ووصلنا الحمد لله ورحنا ركبنا المترو فى الحر الفشيخ ده وجه فى بالى بقى كل الاغانى اللى فيه كلمة مترو (ما انت محشور فيه شويه ) ووصلنا الحمد لله وعلى الرغم من صعوبة الطريق الا ان كان الاصعب اننا نوصف لـ د/علاء ازاى يوصل المكان بعربيته لدرجة ان كان فيه اتنين بيوصفوا المكان مش واحد بس :D وحضرنا الحفلة انا وعلاء ود/علاء وصديقه اللى تعرفت عليه فيما بعد وخلصت الحفلة وكان د/احمد لسه فى مشوار فى مدينة نصر فى عربية صديق تانى لان عربيته مفرومه زى ما قولت وملحقش يحضر الحفلة . وخلص اليوم ورجعنا يا دوب على السحور وكل سنة وانتوا طيبين وحلقة جديدة فى حفلة جديدة رحلة جديدة وآه يا رجلى ..
وأسيبكم مع الأغنية المناسبة للحدث ,,
دى مش طريقة فاكر نفسك ماشى لواحدك فى الطريق !؟ شارع ده ولا سيرك ولا معدش حد بيهمه شئ ؟!
مش فى نص الشارع يا اسطه تنزل ناس وتركب ناس ؟! تاخد غرزه شمال ويمين وتخلى اللى ما يحتاس يحتاس !؟
ليست هناك تعليقات:
إرسال تعليق